हातभट्टी दारू विक्री करणाऱ्या सराईत महिला आरोपीला दोन वर्षांसाठी हद्दपार

हातभट्टी दारू विक्री करणाऱ्या सराईत महिला आरोपीला दोन वर्षांसाठी हद्दपार

लोणी काळभोर पोलिसांची कारवाई; प्रतिबंधात्मक कारवाईनंतरही अवैध व्यवसाय सुरू असल्याने पोलिसांचा कठोर निर्णय

लोणी काळभोर (प्रतिनिधी) : अवैध हातभट्टी दारू विक्रीच्या व्यवसायावर आळा घालण्यासाठी लोणी काळभोर पोलिसांनी महत्त्वपूर्ण कारवाई केली आहे. सातत्याने हातभट्टी दारू विक्री करणाऱ्या रेकॉर्डवरील महिला आरोपी संगिता तानाजी भाले (वय ४८, रा. लोणी काळभोर, ता. हवेली, जि. पुणे) हिला दोन वर्षांच्या कालावधीसाठी हद्दपार करण्याचे आदेश पोलीस उपआयुक्त, परिमंडळ ६ यांनी दिले आहेत.

प्रतिबंधात्मक कारवाईनंतरही अवैध व्यवसाय सुरू

पोलिसांनी दिलेल्या माहितीनुसार, संगिता भाले ही लोणी काळभोर पोलीस ठाण्याच्या हद्दीत हातभट्टी दारू विक्रीच्या प्रकरणांमध्ये पोलिसांच्या रेकॉर्डवर आहे. तिच्याविरुद्ध यापूर्वी प्रतिबंधात्मक कारवाई करण्यात आली होती. मात्र, या कारवाईनंतरही ती कथितरीत्या अवैध हातभट्टी दारू विक्रीचा व्यवसाय सुरू ठेवत असल्याचे पोलिसांच्या निदर्शनास आले.

या प्रकारामुळे सार्वजनिक सुव्यवस्थेला बाधा निर्माण होण्याची शक्यता लक्षात घेऊन वरिष्ठ पोलीस निरीक्षक प्रदीप पवार यांनी वरिष्ठांच्या आदेशानुसार संबंधित महिला आरोपीविरुद्ध हद्दपारीचा प्रस्ताव तयार करून पोलीस उपआयुक्त, परिमंडळ ६, पुणे शहर यांच्याकडे पाठविला होता.

दोन वर्षांच्या हद्दपारीचे आदेश

सदर प्रस्तावाची दखल घेत पोलीस उपआयुक्तांनी संगिता तानाजी भाले हिला दोन वर्षांच्या कालावधीसाठी हद्दपार करण्याचे आदेश पारित केले आहेत. पुणे शहरातील अवैध धंदे, मटका जुगार, अमली पदार्थ विक्री, अवैध दारू विक्री तसेच नागरिकांमध्ये दहशत निर्माण करणाऱ्या गुन्हेगारी प्रवृत्तींवर कठोर कारवाई करण्याचे निर्देश वरिष्ठांकडून देण्यात आले आहेत.

अवैध व्यवसायांना आळा घालण्यासाठी आणि कायदा व सुव्यवस्था अबाधित राखण्यासाठी यापुढेही अशा प्रकारच्या गुन्हेगारी कृत्यांमध्ये सहभागी असलेल्या व्यक्तींविरुद्ध कठोर कारवाई करण्यात येणार असल्याचे पोलिसांनी स्पष्ट केले.

वरिष्ठांच्या मार्गदर्शनाखाली कारवाई

ही कारवाई पोलीस उपआयुक्त जीवन बेनीवाल, सहायक पोलीस आयुक्त अनुराधा उदमले यांच्या मार्गदर्शनाखाली करण्यात आली. वरिष्ठ पोलीस निरीक्षक प्रदीप पवार, पोलीस निरीक्षक (गुन्हे) नंदकुमार कोळी, पोलीस हवालदार विलास शिंदे, महिला पोलीस हवालदार स्वाती पिसाळ आणि पोलीस अंमलदार प्रशांत नरसाळे यांनी या कारवाईत सहभाग घेतला.

Advertising Space