तीर्थक्षेत्र थेऊरला ‘पूर्णवेळ’ ग्रामअधिकारी कधी? तीन गावांच्या जबाबदारीमुळे प्रशासनाचा गाडा संथ

थेऊर | प्रतिनिधी

तीर्थक्षेत्र म्हणून राज्यभर ओळख असलेल्या थेऊर ग्रामपंचायतीला दोन महिन्यांपूर्वी ग्रामअधिकारी मिळाला; मात्र, संबंधित अधिकाऱ्याकडे थेऊरसह हवेली तालुक्यातील आणखी दोन गावांचा कार्यभार सोपविण्यात आल्याने ‘एक अधिकारी–तीन गावांची जबाबदारी’ अशी परिस्थिती निर्माण झाली आहे. त्यामुळे थेऊरसारख्या महत्त्वाच्या गावासाठी पूर्णवेळ अधिकारी उपलब्ध नसल्याने प्रशासकीय कामकाजावर त्याचा परिणाम होण्याची शक्यता व्यक्त होत आहे.

थेऊर हे श्री चिंतामणी गणपती मंदिरामुळे महत्त्वाचे तीर्थक्षेत्र आहे. वर्षभर येथे भाविकांची मोठी गर्दी असते. धार्मिक कार्यक्रम, यात्रा, उत्सव तसेच विविध शासकीय आणि स्थानिक पातळीवरील कार्यक्रमांमुळे ग्रामपंचायतीसमोर सातत्याने विविध आव्हाने असतात. याशिवाय गावातील नागरी सुविधा, पाणीपुरवठा, स्वच्छता, रस्ते, अतिक्रमण, विकासकामे आणि नागरिकांच्या दैनंदिन तक्रारींकडेही वेळेत लक्ष देणे आवश्यक आहे.

यापूर्वी थेऊरला स्वतंत्र ग्रामअधिकारी उपलब्ध असायचा. त्यामुळे ग्रामपंचायतीच्या दैनंदिन कामकाजावर तसेच नागरिकांच्या प्रश्नांवर तातडीने निर्णय घेणे शक्य होत होते. मात्र, सध्याच्या नियुक्तीमध्ये संबंधित अधिकाऱ्याकडे अन्य दोन गावांचीही जबाबदारी देण्यात आल्याने त्यांना प्रत्येक गावाला अपेक्षित वेळ देणे कठीण होत असल्याचे ग्रामस्थांचे म्हणणे आहे.

‘थेऊरला स्वतंत्र अधिकारी द्या’

थेऊरचे तीर्थक्षेत्र म्हणून असलेले महत्त्व, वाढती लोकसंख्या आणि ग्रामपंचायतीसमोरील प्रशासकीय जबाबदाऱ्या लक्षात घेता येथे पूर्णवेळ ग्रामअधिकाऱ्याची नियुक्ती करावी, अशी मागणी आता जोर धरू लागली आहे.

एकाच अधिकाऱ्यावर तीन गावांचा कार्यभार देण्याऐवजी प्रत्येक गावाच्या गरजा आणि महत्त्व लक्षात घेऊन स्वतंत्र अधिकारी उपलब्ध करून दिल्यास नागरिकांची कामे अधिक वेगाने होतील आणि ग्रामपंचायतीचे प्रशासनही अधिक प्रभावीपणे चालेल, अशी अपेक्षा ग्रामस्थांकडून व्यक्त केली जात आहे.

तीर्थक्षेत्र थेऊरच्या प्रशासकीय कामकाजाला ‘पूर्णवेळ अधिकारी’ मिळणार तरी कधी? हा प्रश्न आता ग्रामस्थांकडून उपस्थित केला जात आहे.

Advertising Space