ज्येष्ठ नागरिकांना PMPML बस पासमध्ये ५० टक्के सवलत; आजपासून अंमलबजावणी

पुणे : पुणे महानगर परिवहन महामंडळाने (PMPML) पुणे व पिंपरी-चिंचवड महापालिका हद्दीतील ६० वर्षे व त्यावरील ज्येष्ठ नागरिकांसाठी बस पास दरात ५० टक्के सवलत देण्याचा निर्णय घेतला आहे. या निर्णयाची अंमलबजावणी आज, २४ ऑगस्ट २०२६ पासून सुरू करण्यात आली आहे.

पुणे महानगरपालिकेच्या स्थायी समितीच्या अध्यक्षांनी २ एप्रिल २०२६ रोजी ज्येष्ठ नागरिकांना पास दरात सवलत देण्याची मागणी PMPML प्रशासनाकडे केली होती. त्यानंतर २४ ऑगस्ट रोजी झालेल्या PMPML संचालक मंडळाच्या बैठकीत या योजनेला मंजुरी देण्यात आली.

नवीन निर्णयानुसार ज्येष्ठ नागरिकांसाठी सर्व मार्गांवर प्रवासासाठी असलेल्या दैनिक पासची मूळ किंमत ७० रुपये आहे. मात्र, ५० टक्के सवलतीनंतर प्रवाशाला केवळ ३५ रुपये द्यावे लागणार आहेत. उर्वरित ३५ रुपयांचे अनुदान पुणे व पिंपरी-चिंचवड महापालिकांकडून प्राप्त होणार आहे.

या निर्णयामुळे पुणे आणि पिंपरी-चिंचवड शहरात सार्वजनिक वाहतुकीचा वापर करणाऱ्या ज्येष्ठ नागरिकांना मोठा आर्थिक दिलासा मिळणार आहे. तसेच ज्येष्ठ नागरिकांसाठी सार्वजनिक वाहतूक अधिक सुलभ आणि परवडणारी होण्यास मदत होणार आहे.

PMPMLचे अध्यक्ष व व्यवस्थापकीय संचालक महेश आव्हाड (भा.प्र.से.) यांच्या आदेशानुसार ई-तिकीट प्रणालीमध्ये आवश्यक बदल करण्यात येत असून, सदर सवलतीची अंमलबजावणी आदेशाच्या दिनांकापासून करण्यात आली आहे.

Advertising Space