वाघोलीत मोबाईल चोरी प्रकरणी पोलिसांची मोठी कारवाई; १३ मोबाईल धारकांना दिला दिलासा

वाघोलीत मोबाईल चोरी प्रकरणी पोलिसांची मोठी कारवाई; १३ मोबाईल धारकांना दिला दिलासा
वाघोली : वाघोली पोलीस स्टेशन परिसरात वाढत्या मोबाईल चोरीच्या घटनांमुळे नागरिकांमध्ये चिंतेचे वातावरण निर्माण झाले होते. मात्र या पार्श्वभूमीवर वाघोली पोलिसांनी तत्पर कारवाई करत नागरिकांना मोठा दिलासा दिला आहे.
वाघोली पोलीस स्टेशनचे वरिष्ठ पोलीस निरीक्षक नंदकुमार गायकवाड आणि क्राईम पीआय पल्लवी मेहेर यांच्या मार्गदर्शनाखाली विशेष तपास पथकाने सायबर तंत्रज्ञानाच्या मदतीने चोरीस गेलेल्या मोबाईलचा शोध घेतला. या पथकात एएसआय रमेश साबळे, पोलीस कॉन्स्टेबल वृंदावनी चव्हाण आणि पोलीस शिपाई सतीश बिरादार यांनी महत्त्वाची भूमिका बजावली.
तपासादरम्यान विविध ठिकाणी पाठपुरावा करत अखेर १३ चोरीस गेलेले मोबाईल शोधण्यात पोलिसांना यश आले. संबंधित मोबाईल त्यांच्या मूळ मालकांना परत सुपूर्त करण्यात आले असून, नागरिकांनी पोलिसांच्या या कार्याचे कौतुक केले आहे.
या कारवाईमुळे परिसरातील गुन्हेगारांना चाप बसला असून, मोबाईल चोरीच्या घटनांवर आळा बसण्यास मदत होणार असल्याचा विश्वास पोलिसांनी व्यक्त केला आहे. तसेच नागरिकांनी आपल्या मोबाईलची सुरक्षितता राखण्यासाठी सतर्क राहावे, असे आवाहनही करण्यात आले आहे.

Advertising Space